Myen Tai Hpyen ni gaw mana de hkying 8:30 pm ( 21.july.2011 ) kaw na Laiza mare de laknak kaba ni hte gap bang nga ai lam na chye lu ga ai. Ya na zawn laknak kaba ni hte gap hpang wa ai hpang Nayi hkum myi laman hta sha myawk si 20 jan gap bang lai wa sai re. Madung gap bang nga ai shara gaw Myutsaw brang ni shara la da nga ai Dung 24 shara de re lam na chye lu ga ai.

Myen ni gaw ya shan hte du taw ai shara Daw Hpum Yang kaw na ( 120 mm ) hte gap bang ai re. Myawk si ni gaw Laiza hte deng mi daram sha tsan ai shara hta hkrat kapaw nga ai lam na chye lu ga ai.

Laiza mare na buga masha ni hte hpyen hprawng tsin yam masha ni yawng mung Miwa ga maga de hprawng shang na matu rai shajin let jin jin rai aten tup maja nga ma ai lam na chye lu ga ai.

Dapba 3, Dapdung 15 ginra Sang Gang hta e daihpawt manap 8:00 daram hta Myutsaw brang ni hte Myen tai hpyen ni majan byin lai wa sai re.N'dai majan hta Myen de na ( 6 ) hkrat sum sai lam na chye lu ga ai.

Hkaya hta Shanglawt Myutsaw brang ni wang matep da ai kata hta chyat rawng nga ai Myen tai hpyen ni gaw jam jau n'dang hkam wa ai majaw lata sharawt laknank jahkrat ai ni law wa ai lam na chye lu ai.

Mani ( 17.July.2011 ) laban ya shani hta Myen (Hka.La.Ya - 21) Du Jum Aung khain Win hte hpyen ma lahkawng kaw na shawng lata sharawt laknank jahkrat hpang wa sai hpang, myen hpyen la ni law law mung rim katut ai gaw rim katut lata sharawt laknak jahkrat ai jahkrat rai ganing n'chye di si htum wa nga sai lam na chye lu ga ai.

Jak sinat lahkawng hte rau laga laknak kaji ni law law hpe Shanglawt Myutsaw brang ni lu rim gashun la lu sai re.

Ya ten hta Dawhpumyang hte Namsanyang lapran hta chyat rawng nga ai myen hpyen hpung ni gaw htum ma wa sai daram rai sai hte mana de maga mung Myen ni Myen mang Mawdaw mi htaw lup kau sai lam matut na chye lu ga ai.

Mani 16.July.2011 shana de daw hkying 3:30 daram kaw na gap hkat hpang wa ai hkaya majan gaw ya daini du hkra matut manoi ga hkat nga ma ai re.

Shanglawt Myutsaw brang ni wang matep da ai lapran hta Myen tai hpyen ni grai jam jau nga ai hte myen 30 n'yawm ai sha hkala sai lam na chye lu ga ai. Myen Du jum 1,hpyenla 1hte hpyen mawdaw gau mawdaw la 3 hpe gaw chyahkrung rim la na dung 23 de woi wa sai lam matut na chye lu ga ai.

Shanglawt Myutsaw brang ni maga de na mung Du Tau Awng Ja hte rau hpyen ma 2 hkrat sum mat sai lam na chye lu ga ai.

Manmaw hte Myitkyina maw daw lam Namsan yang makau Hkaya hte madi yang lapran kaw dai na de daw hkying 2:30 pm kaw na Shanglawt Myutsaw brang ni hte Myen tai hpyen ni gap hkat nga ai lam na chye lu ai.

Matut Manoi gap hkat nga dingyang re hta Shanglawt Myutsaw Brang ni Myen sawa mang 4 lu garawt la lu sai lam teng man ai shiga lawk kawn na chye lu ga ai.

Majan gaw n'ngut shi ai sha matut manoi naw gap hkat nga ma ai re. Myen de na gaw dung (56), (74) ni rai n'na Lasang Awng Wa a masha ni mung lawm na masa nga ai lam na chye lu ai.

Dapba 3 Dung 15 hta Myu tsaw brang ni hte Myen ni nayi hkum 3 daram majan byin, Myen de na langai hkrat.

Majan byin ai shara gaw Lai wa sai ( 9.June.2011 ) ya shani hta Myen hte Shanglawt majan byin hpang wa ai shara Sang Gang mare makau hta re lam na chye lu ga ai.

Dai ni Ba (2), Dung (11) de myen tai hpyen ni hte Shanglawt Myu Tsaw Share shagan ni gap hkat ai lam hpe na chye lu ai. Kata lam matut sagawn nga ai.

Dai na maga de hkying (2) ram hta, Ba (3), Dung (12) ginra Mai Hkawng, Je Hkam Mare kaw myen Hka La Ya (105), (236), (144), (74) dap ni hte Shanglawt Myutsaw ni gap hkat ai lam byin wa sai lam na chye lu ai. KIA kaw na Sniper hpung ni madung gap gasat ai re lam hte myen de na marai (4) yam htum hkrat sum wa sai lam na chye lu ai.

Myen tai hpyen ni mawdaw kaba (50) hta myen hpyen la tup htaw nna wanleng lam hku Jinghpaw Mung de lung wa sai lam, ya ten Naba makau kaw du wa sai lam shiga na chye lu ai.

Man Maw hta dung ai ( SA.KA.KHA - 21 ) Hpyen hpung ni gaw shanhte a hpyen mawdaw ni hte Manmaw kaw na Myitkyina maga de lung wa ai lam N'mawk hte Tahkaw hka lapran na Chyahkandap mare makau hta Myutsaw Shanglawt hpyenla ni a bawm katut ai majaw masha 30 n'yawm ai sha hkala hkrum sai lam na chye lu ga ai.

Dai Myen hpyen mawdaw ni hta na langai myi gaw la hpa n'nga hkra kapaw a yai mat sai hte laga langai myi mung grai sawng mat hkra kapaw lawm mat ai lam shiga na lu ai.

Myen Hpyen ni gaw maga myi de simsa lam nga woi bangban masu na maga myi de majan a matu aten tup shamu shamawt nga ma ai re.

KIA Dung (5) shawng lam shiga gahtet ( july 3, 2011 ) laban,

KIA Dung (5) daju shara Shwe Gu Ginwang hta KIA Myu Tsaw Share Shagan ni kawn Myen hpyen ( Hka La Ya 141 ) ni dumsu leng hte laknak, malu masha htaw lung wa ai shaloi lam hta gap gasat ai hta Myen Hpyen sawa (5) n'yawm si mana sha mat n'htawm laknak 4 mung lu zing la lu ai lam shawnglam majan pa tengman shiga kawn chyen lu ai.

DUNG (7) NI MATUT GAP NGA

KIA Dung (7) ginra, Sumpra Bum Mare a sinpraw maga Hkrang Hka makau Mile shadaw masat 90/7 kaw KIA bawm hte myen hpyen la (2) si nna (2) hkala kaba hkrum ai lam hte KIA hte myen tai hpyen hpung ni gap hkat nga ding yang re lam shawng lam de na shiga shang wa ai.

MYEN HPYEN NI A ZINGRI HKRUM

Wai Maw mare makau, Wu Yang mare na Slg. Um Tang, Slg. Lisu Yaw hte manang (1) hpe myen hpyen dap Hka La Ya (58) kaw na ni rim la mat wa ai hta marai langai hpe sat kau nna marai lahkawng hpe a dup zingri let na lahkawng maga gadoi di kau ya lai lam buga masha ni kawn shana wa ai.